المدينة اليومالحالة
القدس7
رام الله7
نابلس9
جنين11
الخليل6
غزة12
رفح13
العملة السعر
دولار امريكي3.6452
دينار اردني5.1414
يورو4.2065
جنيه مصري0.204
ريال سعودي0.972
درهم اماراتي0.9925
الصفحة الرئيسية » أقلام وآراء
2019-03-31 10:27:05

بلد عايشة ع نكشة: شو بدك من الوزراء؟

وزير المواصلات: مكانك بين السواقين والفوردات في الشوارع وعالدوار والمفارق.

وزير الزراعة: بدك تلبس البسطار، تحكي مع المزارع الغلبان، وتخرف مع ستي الي بتبيع عكوب وجرجير باب الحسبة، وبدنا سياسة استصلاح، بكفي استيراد!

وزير الاتصالات: بدناش تفهم في اشارة جهاز اللاسلكي، بدنا تعرفلنا ليش الاشارة ما بتوصل أو ضعيفة وسعرها نااار!

وزيرة المرأة: يختي اشتغلي عالرجال وأفكارهم المسكرة مش بس عالنسوان، بعدين نفسي تركزي في هدف واحد وتنجزيه طول السنة!!

وزير الخارجية: ما زهقت! بانتظار جديدك، بس بين سفراتك ومهماتك شوف الجاليات الفلسطينية الي بالعالم وتعلم من جبران باسيل وزير خارجية لبنان.

وزير السياحة: نفسي اشوفك بتقود وفد سياحي محلي أو دولي تورجيهم بلدنا الحلوة، هي مش كلها دمار، ولازم تضلك تفر من سبسطية لدورا الخليل للقدس لطواحين الهوا لتل تعنك!! مش معقول وزير سياحة بيعرفش تل تعنك!!!

وزير التربية والتعليم العالي: بدك تعليم ذكي! طب في مدارس فش فيها نت! وياريت تعيد النظر بمناقصات الخدمات في المدارس!

وزير التنمية والشؤون الاجتماعية: عفكرة الكل بيدعم مش بس وزارتك، مؤسساتنا كلها فيها بند الشحدة، بس بما انها وزارة تنمية مش بس شؤون بكفيش تطعميهم سمك.. علمهم كيف يصيدوا! والله ابن صف أول بعرف هالخراف!!

وزير الداخلية: سقا الله ع أيام لما كان يتعين وزير للداخلية، هلء ما عم نسترجي، والأجهزة الأمنية سارحة، سارحة فينا طبعا (الله يحميهم)

وزير المالية: يا أخي كل موظفي وزارة المالية كبارية، وما حدا برد عالتلفون، بليز اعمل ورشة عمل وعلمهم يردوا ع تلفوناتهم، شو هالوزارة الي سكرتير او سكرتيرة فيها بتحكم البلد، بعدين بدناش جوائز عالتخطيط المالي الخرافي، ما تغير شي من هالتخطيط!!

وزير العمل: ربطة العنق (الجرافة) ممنوعة مع العمال والكادحين.. وخف ايدك ع مؤسسة الضمان.

وزير الأشغال العامة والاسكان: شغلك التخطيط العمراني، أموت وأعرف ليش البنايات بتطلع فوق بعض! شو خص الاحتلال بالتخطيط!

وزير الصحة: نفسي اسمعك بتعلن نتائج تحقيق اي خطأ طبي أودى بحياة مواطن أو حول طفل سليم إلى معاق.. يا عمي خلص تفتتحش مشافي ومجمعات طبية، زبط الموجود بدل ما هو عجب العجاب!

وزير العدل: خفف صور وما تشارك بتحدي العشر سنين تبع الفيسبوك، حياتك بين القوانين والتشريعات والكتب والدراسات غير هيك مش عدل!

وزير الاقتصاد الوطني:  شو بدنا منه؟ بدنا اقتصاااد.. وتنزل البطالة عُشر بالمية.. دخيلكم!

وزير الحكم المحلي: تحدد معايير للبلديات الذكية، تعمل تقرير عن آداء البلديات، ومسابقة لأحسن بلدية كل سنة، وتشيل رئيس البلدية الي مش نافع.. خليهم يتعظوا! بدنا نعرف بتمون عالبلديات والا لأ!

وزير الأوقاف: مسامحتك! بدناش منك شيء! صلي ركعتين لله وادعي الله يهدينا، بكفي! اه وتنساش تراقب شيوخ الجوامع، تأكد انه يكون إلهم قدر وقيمة بين الناس والجيران حواليهم، ويركزوا عالأخلاق وبس!

وزير الثقافة: اوعا تحكي في السياسة، خلينا في خطاباتك ومشاويرك نسمع شي عن الادب الفلسطيني.. يعني اذا عندك معلومات تفيدنا!

أما الملاحظة المنكوشة لكل الوزراء ورئيس الوزراء ونوابه ومستشاريه: عفكرة عادي تحضروا مؤتمرات، الفكرة مش بس نشوفك خمس دقايق تقص الشريط وكلمتين وتطلع، كشيلك احضر، اسمع، اكتب ملاحظات، هو انت مفكر قص الشريط ابداع وريادة!! ولك وين مروح؟ احضر يا أخي احضر شوف الناس، احكي معهم بالبريك، اقلك خليك للغدا عالأقل.. والله ما انت مروح! شو هالأمة هاي صار مسؤول وعن دانه مش مسؤول!!

بقلم/ بثينة حمدان



مواضيع ذات صلة




قضايا وتقارير

عدسة قدس نت

صورالأسيرعمرخنفرمنمخيمجنينيرزقبتوأمعبرنطفةمهربة
صورأسبوعالتراثالعاشرفيبيرزيت
صوراشتيةخلالحفلانهاترميموتأهيلوإدارةوتشغيلمقامالنبيموسىبأريحا
صوراشتيةخلالترأسهجلسةمجلسالوزراالأسبوعية

الأكثر قراءة