ما أحلي هالطلة ...وما أجمل هالصوت ...وما أحلي هالصورة ...وكلو شغال علي حفتك لفتك ... والربيع وصل بالشتاء ...وبايدنا نقسم المقسوم ..ونجزء المجزأ..والله يبدو انه الربيع وصل ..وفش حد أحسن من حد ...وليش لما احنا نكون بنخزي غيرنا كان بخزي ..والنتيجة ما حد فاز ...والكل سقط ...والخسارة للجميع ..والكل بسلة واحدة يعني ما فيها شطارة الشطار ...وتذاكي الاذكياء يعني ماشيين علي مقولة عنزة ولو طارت وكلوا علي المكشوف ..والجمل لما بقع بكتروا ذباحينه ..وكلوا علي الدور ...متتزحموش كلوا علي الدور ..ومفيش حد راح يطلع سالم وغانم ...كلوا خسران وتعبان وزهقان وقرفان وطالع من أوعيه .
ومن شر حاسد اذا حسد ...يبدو أننا انتصينا عين من كتر ما كنا كويسين ومحترمين ...وبنحب بعض لحد الموت ...وقلبنا علي قلب بعض ..وبنخاف علي بعض من الهوا الطاير ..وايدنا بيد بعض ...وفكرنا علي فكر بعض ..وكأننا رجل واحد ..وشعب واحد ...وكأننا أصحاب قضية واحدة ...وكأن عدونا مشترك ..ما شاء الله علينا خلينا علي كده ...الله لا يغير بقوم حتي يغيروا ما بأنفسهم ...لا بنتعلم ولا بنعلم ..ولا بنراجع ولا بدنا حدا يراجعنا ..كل شي تمام التمام وزي الفل ..وخلي النائم نائم ...اوعوا يصحي ..خليه نائم النوم أحسن ..لأنو يلي بصحي بياكل هوا وراح يتعب الي حد الموت من الفرح من كتر ما احنا !!!من كتر ما احنا مستغلين وانتهازيين ...مش بدكم الصراحة ..مش احنا بنحب الصراحة ...مش احنا عايزيين الحقيقة وكلمة الحق وبنكره الكذب والكذابين ..والنفاق والمنافقين ...والاستغلال والاستغلاليين ...والانتهازية والانتهازيين ...مش بنكره المال الحرام ومش عايزيين فساد ...ولا نريد الا المال الحلال ..مش احنا بنكره الظلم والظالمين ....والحرامية والسراقين لأننا في أرض القدسيين والله احنا لازم نعلم الناس كيف يعالجوا أزماتهم لأننا بصراحة احنا خارقين ...خازقين ...مخزوقين ..مش نافعين ...بدكم صراحة أكتر والا بكفي !...عشان نحافظ علي المعنويات وارادة التحدي والصمود ....ايش هادا !!!مين يلي بخطط كل هادا ...مين يلي بلعب فينا هيك ..الاحترام غائب ..,المحبة والتأخي مفقود ..والتسامح والعدل مقلوب ..والوحدة طارت ...صحيح محدش يحكي عن الوحدة بعد اليوم ..لأننا أكثر الناس وحدة بس محدش شايف ..ومحدش حاسس ...نحن ملتصقين التصاقا متطابقا ..وتمسكنا وتشبثنا واصرارنا ومحبتنا وصمودنا وعنفواننا ....الخ ..يخزي العين !!!!مش أحسن لو تركتونا نعيش لحالنا... وبدناش حكومات ولا قيادات ولا نقابات ولا مؤسسات ولا حقوق انسان ..اتركوا الناس تعيش لحالها ..مش أحسن الكم والنا ...هو يمكن أحسن النا ...ولكن مش احسن الكم ...فأنتم لا تعملون شيئا للناس.... وحتي لا نظلمكم بتعملوا صحيح ...بتصرحوا ..وبتخطبوا ...وبتطلعوا علي التلفزيون ..وبتتحدثوا عبر الاذاعات ..وبتجروا مقابلات بالصحف ..وبتعقدوا مؤتمرات صحفية ...والله أشهد انكم بتحكوا ....صحيح انسيت اشي مهم انو كل واحد فيكم عندو صفحة علي الفيس بوك وتويتر وعلي مواقع التواصل الاجتماعي وبغرد تغريداته ..وبخرب الدنيا ..دون أن يدري أو يدري ....لا بصراحة بتحكوا ...وبتحكوا كويس ..الحكي كلام مصفت وكلو بلاغة ببلاغة ..لكن للأسف فكركم في حد بسمعكم ...في حدا مصدقكم ..اوصلتوا الي حد ما حدا يثق فيكم ..عيشوا بين الناس واسمعوا ...ليس كل الكلام ..لكن صدق الكلام ...والله خالق السموات والارض لو سمعتم ما بداخل الناس من كلام ....لن أستعجل القول...بدكم أكتر والا بكفي !!! لأنوا بصراحة راح تنحسدوا فوق ما انتوا محسودين ..لو حكينا أكتر من هيك .
ودائما يخطر ببالي وفي بال غيري... لماذا تفعلون بنا كل هذا ؟؟!!..وماذا فعلنا لكم ؟؟!! ....يا عمي ..يا كل قادتنا وفصائلنا وحبايبنا الي نائم والا صاحي ...ولي واقف ولا قاعد ...خدوا كل كراسي الوطن ووزعوها عليكم وما تخلوش ولا كرسي ...واحنا والله راضيين نضل واقفين ..أو اذا بدكم نكون نايمين مش صاحيين ...أو اذا بدكم نكون ميتين ..كولوا عنا ..واقبضوا عنا ...كلو حتي تشبعوا ...ملاذ الهنا والعافية ...علي قلوبكم وكروشكم ...احنا علي الملحة بنعيش ..والعدس كتير ..والخبيزة مع الشتا ماليه الارض ..ما تقلقوش علينا...بنعرف انكم مش قلقلنين ...وناموا الليل الطويل وما تفكروا فينا أصلا عارفين انكم ما بتفكروا فينا...ضلكم تجادلوا وخبطوا ببعض زي ما بدكم ..المشكلة مش عنا.... .المشكلة عندكم فكروا بحالكم ..وكيف تسلكوا أموركم ..ونحن لنا الله ..ولا شي سواه .
بس عل فكرة أنا مش مفتي ...لكن في ظل الفتاوي الكثيرة ..ومنها الي مش صحيح اكتر من الصحيح ..حرام تستغلوا ظروف الناس ..حرام أن تلعبوا بأعصاب الناس ..حرام أن تتلاعبوا بقوت الناس ...حرام أن تجعلوا من الاعلام منبرا للتخوين وكيل الاتهامات وعدم قول الحقيقة ..حرام أن تخدعوهم بأكاذيب وافتراءات ...حرام عليكم أن تدغدغوا العواطف وأن تلعبوا بأحاسيس الناس ...هناك الكثير من الحرام الذي يمر ويصدق ...لكن الحقيقة تبقي ساطعة ...والاسباب الحقيقة واضحة وليس من الذكاء أن نمسك بالنتائج ...ونترك الاسباب التي أدت الي مثل هذه الكوارث .
حتي خرج عليا.... من قال لي أسكت ..اصمت ..والا خليت ليلك زي نهارك ..ونهارك زي ليلك ..روح نام زي يلي نايمين ..أو روح موت زي يلي ميتين ..احنا ..احنا يلي اعملنا من الفسيخ شربات ..ومن مياه البحر مياه عذبه ..احنا الا ما بنام طول الليل واحنا بنطعمي وبنسقي ...قلت له عمر بن الخطاب رضي الله عنه قد مات والعدل الذي كان أيام عمر رضي الله عنه لم يعد موجودا ..رد عليا بقوة أنت لم تلمس عدلنا ...وخوفنا ..وحرصنا ...قلت له يبدو أنني لا أعيش في هذه الدنيا التي أنتم فيها ..وأعيش كابوسا جعلني أتحدث بمثل ما تحدثت ...الله يحميكم ويحفظكم ..ويبعد عنكم شر الحاسدين ...لأنكم بصراحة بتنحسدوا علي ما أنتم عليه .
الكاتب : وفيق زنداح