في غزة بس... كله مسقف وحساس ... امر طبيعي ..غزة كيس بصل وين ما حطيت ايدك بتطلع راس...!!

كله زعيم ابن زعيم . كله ابن (دولة الوالد)..!! كله فهمان ومحلل سياسي... وفي كل طوشه لاعب اساسي ومسا التماسي مسا التماسي ياورد قاعد على الكراسي..!!

كلنا مسقفين ...الله وكيلك من حامل الدكتوراه لحد بياع اكياس الطحين ... والمسقفين انواع...

منهم مسقف حقيقي.. ابن ناس..دارس وواعي وعالم ..تحس من اول كلامه انه في كل مجال فاهم من الفكر للفنون لديوان المظالم !! هادي لو كلمك واهدا لو اختلف معك.امام تواضعه تسكت وتسمع وتخشع ولو حاورك امتعك وافادك وا قنع ..!!

ومنهم مسقف اتنين في واحد.. شرعي وفرعي..مزور.. مزور.. وضاوي ع الله ..تصنيع محلي ماركة (x)..قاري كتابين من زمان وناسيهم ..ويفتي في كل شيء من الدين لحد ال6 ..!!. وتحس من اول كلامه انه في مجاله ظالم ومستفز..يشخر ما يصبر وع الهايفة يفطر..امام غروره تطحن وتفري..وتخلع ..لما يقدم نفسه على انه الناطق باسم الحقيقة ولا تقول بخاري في موسم تجاري..واخاف احكي كلمة قبل ما افقع .. ييجي ع بالي ابن المقفع..!!

يرغي مايتعب ..كانه اسطوانه او معلق في ملعب..و لما تناقشه اوتبدي رايك كطالب مؤدب او حتى تعتب .. ويزعل ويحرد..وينطر ويغضب... ياويلك ياويلك..ياظلام ليلك لو معاه اختلفت.. يصير في الحال عدوك :

مين انت ؟!!انت مين..عشان تختلف معي..؟!!..انا اول صف وانت اخر صف.. انت ديتك شيكل واحد وانا مليون و مية الف ..!! سامحني يا باشا.. سلامة مزاجك.. والله ماقصدي ازعل سموك... ولابدي اعكر في هالساعة جوك.. ياسيدي لا الذنب ذنبي ولا لي قرار.. بس ايش نعمل في الديمقراطية وادب الحوار .اللي.ساوت ما بيني وبينك وبين الحمار..؟!!

ومنهم مسقف..بدو يعيش.. في عالم لحاله محبش مليش... ملوش دعوة باللي جاري ويجرى.. قعدة وعريشة وحجرين معسل ونازل تشييش... مترمل حبيبي ..ومعمر الطاسة بقرشين حشيش !! يخطرف ..يخربش.. ويحكي شمال يمين .يحط البطاطا على خيار مخلل على مربى تين ..ويقولك قصيده مابعد الحداثة..!! الناس تاكل خرا...وهو ياكل بلادة وتناحة بالشوكة والسكين.. ويمخمخ في ليله (بدري وهنية) بريحة الياسمين ..!!

والعجيب الغريب تلاقي له شلة خصوصي تهلل.. تسقف حتى لو عطس.. او لو تململ جنابه وخياله رفس.. وانا من رايي انه عاهة شعر أواعاقة نثر.. بس وخلص..اتمنى لو راح شهيد في الحرب او تحت مقطورة انفعص..!!

ومنهم مسقفة.. انثى في صورة ذكر...تحس كأنها عايشة في هالدنيا جكر.. ضحكتها خالعة وريحتها طالعة ..باينها شكر...تدخن ..تشيش...تفيش عجايب وتلعب خطر... دلوعة غنوجة .. عميدة تحرش و سلفي عجب.. لا تعرف لغة ولا تعرف ادب .. ولا تميز بحرالطويل من ايقاع الخبب.. ومن حواليها يرفوا المعجبين الحبايب بالتضاريس والاطايب..اشي غرام وغزل ..واشي فصيح وزجل..وعظمة على عظمة ياست..!!والست ربنا يستر عليها ..ما بين حضن جايي وبين حضن رايح..مصنع فضايح وهات بالعجل ..وهيا عينيها اخر بجاحة وانا من كسوفي يعتريني الخجل وهيك طالعة نازلة.. لحد ما يوم يواريها الاجل!!

ومنهم حامل دكتوراه منافق سر وعلن ...لكل حكومة ولكل عزومة.. ولكل ميت قبر و كفن... رقاصة اصلي.. بيحب الوزارة وطعم الامارة وكل انبطاحة والها ثمن ...!!

وقال بيحكوا عن نخبة قال ..!! يا ولاد الحلال ..وين هالنخب الصعبة اللي طالعة في السحبة ؟!!

صحيح فيه نخبة طيبة عندها كرامة ..ومحترمة حالها ..ضابة خيرها شرها...وحاسة ان المجال مش مجالها... لكن اللي شفته واللي عشته..نخب.. اكثر مافيها قليلة ادب .. تطفل بلاوي جايه طبب.. في زمان مطين لحد الركب.. ونخب النخب في صحة شعبنا اللي هان وانتكب...نخب ع الطلب.لكل من في الحمام غنى انطرب وكل في منامه انشعر وكتب ..!! وكل من في راسه يطلع رواية ومين غيره يبقى عميد الادب..؟!! مجموعة دكاكين.. اشى ملتقى واشى مجموعة..واشي منتدى .. شبهة واذى ..!!

نخب مسيسة وملمعة بزيت الفصائل غرورة..وظاهرة في الصورة ..مكركبة..مضحكة..وما الها ضرورة..شوية سقايط همايط وناس مسخرة... شامي ومغربي تلملموا في مبعرة ...كل واحد عنده قناعة انه (درويش) زمانه .. والثقافة ملهاش وجود من غير عبقريته وكيانه.. وتلاقيهم بيحبوش بعض ولايعطوا قيمة ..وقعداتهم دايما كره ونميمة ... لا عندهم قيم رجولة ولا مروءة وفاء ... ان مات صاحبهم صباحا نسوه في المساء ...!! هدفهم هلامي وهمهم الاضواء... عند الصور يتجمعوا...وكانه مولد و عرض ازياء.. وعند اللزوم يتفرقوا... مااااء ..مااااء.. مااااء..وكأن الجمع ياحلو ماراح ولا جاء..!!

ولحد هان ...خذوا فنجان قهوة بالحب وحب الهان... وترحموا على ناجي العلي حنظلة وروح الشهيد غسان ...

وساق الله يا ماغوط.. كاسك يا وطن .. هاي ياجماعة مسقفين اخر زمن ..!!

بقلم/ توفيق الحاج