السيد ابو العبد الفلسطيني..نتشرف بدعوتكم لحضور القمة...

قلت.. غريبة لا يكون غلطوا بالعنوان..

قالت أم العبد.. لا ما غلطوا... ليش هو انت قليل...!
ما إسمك بلعلع في الفيس ابوك

قلت ..بالك... يخرب شر الفيسبوك شو برفع ناس وبوطي ناس وبطَلع زعامات. !
والله وطلعت معاك يا ابو العبد..بس يا أم العبد في شرط..

قالت..شو الشرط..!

قلت... اقرأي..يحضر معك وفد من ثلاثة قادة محترمين
رجلين وسيده

قالت ..وليش محتار شوف لك سيدة محترمة و اثنين قبضايات..

قلت..سيدة محترمة...! موجودة ..وليش نروح بعيد

وبس منين بدي الاقي اثنين قبضايات..!

قالت وهي طايره من الفرح.. مين السيدة ..أكيد أنا...يا بايي ما أحسنك هس عرفت غلاوتي عندك.. شايف كيف ربنا بدو يفرجها علينا أنا وانت ونطلع فوق فووووق. ..

إسمع أنا موافقه...بس على بين ما تدبر الزلمتين بدي أروح أشتري لي فستان محترم ، وهات لك الف ليرة بسرعة قبل ما تروح علينا..

قلت ..ألف شو.. فستان بالف دينار....يخرب شرك ولك كل اللي معي بيجوش ألف دينار ..وبعدين من وين نكمل لآخر الشهر..!

قالت..يا عيني عليك ..ما انت بعد القمة بتصير مليونير
والدول المالحة بتدير عليك الدولارات بالشوالات

قلت.. هدي وروقي وبلاش فعفطة... والدول المالحة على قولتك بطلت تكب مصاريها... صارو يدققوا ويحاسبوا على الفلس.. ما هم كشفوا البلاوي الزرقا والحرمنه الحمرا

قالت..ول ول ول كيف واحنا شايفينهم بيلعبوا بالدولارات والعمارات والسيارات .والطيارات ..هس وقفت عندنا..!

قلت..وقفت عندنا ما وقفت عندنا ..هي وينك اسمعي..لا يكون أنت السيدة اللي بدي آخذها معي.. هاي إنت بتحلمي..

قالت.. ليش مالي ما أنا برفع راسك شو مش معبيي عينك .!

قلت..أينعم انت محترمة وبلاقيش أليق منك ..بس بيقولوا يا حيف جايب مرته معه.. وبصير مصخره بين الزلم..

قالت..أي هو في زلم.... والله إنك متوهم
قلت...يا بنت الحلال مش مليحه بحقك كمان لا انت سياسية ولا بتعرفي في البروتوبول والأمور الثانية

قالت..هيك معك حق بس مين هي اللي خطرت على بالك..
قلت...في غيرها ...الدكتورة ريما خلف

قالت.. أيوا يعني خراب بيت دولي.. هيك بتزعل هيئه الأمم واحنا مش ناقصنا..

قلت..طيب هاتي واعطيني انت أسماء

قالت.. بعطيك بس بتحلف إنك ما بتغيرهم...

قلت ..بحلف بس يكونوا عز الطلب

قالت إحلف بالأول.......حلفت

قالت خذ معك السيدة أحلام التميمي

السيد أحمد الدقامسة

والسيد باسل الأعرج

قلت..يخرب شرك ول ول ول شو هالوفد..!

ولك يا بنت الحلال أنا رايح على قمة مش على حرب..افهمي

قالت..يا زلمة مهي برضو حرب ليش إنت شايفهم متصالحين مع بعض مهو كل واحد فيهم مبيت للثاني ...قول الله

قلت..بس انت هيك لخبطيني او إنك إنهبلتي..!

قالت..ليش...لا تلخبطط ولا انهبلت

قلت.. أحلام والدقامسة عايشين. ولكن باسل ميت

قالت ..شايف كيف إنك بلشت إنت تخربط ومين المهبول أنا ولا انت..!

قلت.. ليش يا فصحه..!

قالت..يا زلمة كيف باسل ميت.. !

وربنا قال.. ولا تحسبن الذين قتلوا في سبيل الله أمواتا بل أحياء عند ربهم يرزقون..بس انت خذ معك احلام والدقامسة أما باسل بتلاقي هناك..

قلت..أبايي ذبحتيني

قالت.. يا الله حضر حالك والبس بدلة سودا وجرافه حمرا ..بدي أياك تطلع عالتلفزيون أزعم واحد فيهم..

بلشت أحضر حالي..
بس بيني وبينكم .. بلش القلق والخوف يعتريني....

وتذكرت أني رايح على قمة مش على حفله ..طيب كيف وانا داخل عليهم ومعي فرقة الموت هذه..!!؟

والله من فوق سبع سموات يسعفني وينقذني في آخر لحظه..

واذا أم العبد بتصرخ ...

ابو العبد...قوم قوم شو بشوفك صاير خم نوم...آآآخ يا قلة الشغل...أكل ونوم ..نوم وأكل.. صارت الدنيا الظهر..
ما انت بتظل عالفيسبوك للصبح يلعن الفيسبوك والي اخترعوه

مهو انتم بتتقاعدوا وبتقعدوا بوجوهنا... أكل ومرعى وقلة صنعه وغير شمات الهوا....وأحنا النسوان ما بنتقاعد إلا بالتابوت
قوم قوم خلصني خليني أعرف أشتغل...

روح جيب لنا خبز ولا رغيف في الدار..وبالمرة جيب معك بندورة وخيار وفجل.. لاني طابخه عدس اليوم

قمت أركض من الفرحة.. وأقول الحمد لله أنه حلم
حتى ما غسلت وجهي

وصلت السوق واشتريت بعض الخضار وذهبت لأحاسب مددت يدي بجيبي واذا ما معي ولا قرش..
قال البائع وهو يستهزيء ..شو خير ناسي المصاري...
قلت..بالفعل خرجت من البت ونسيت احضر الفلوس..
قال.مر علينا كثير..شو رايك نلم لك لمه..!!
خرجت وانا أقول في نفسي...

معقول... من القمة.. إلى اللمة...؟

منذر_ارشيد_رأي