بدها زلغوطة: لولولوليششششش، والله وعملها "الهبّاش" وطِلِع بــ راس مع "الرجوب" وقال: حائط البراق لمين (إلنا والله إلنا). أما باقي المسؤولين الي عنا فحراااام صايمين عن الأكل (مؤقتاً طبعاً) وعن الصدق (طووول السنة)، والي كانوا يزعبروا حتى ضد فخامته (ساكتين ساكتين). ضل كم شغلة بدنا قاضي القضاة يجاوب عليها: القيادة لمين؟؟ ومين الي خلّاكم تكبروا وتسيطروا وتبرطعوا!! ومين الي بكركع راس التاني؟؟ (معك طول رمضان تفكر بما إنه الطلاق ممنوع بهاي الفترة والقضاء الشرعي ما بيشتغل وعندك وقت).
في ناس بتكتب نهايتها بإيدها، وفي ناس بتلعب نهايتها برجليها مثل لاعبين كرة القدم، بس إذا سياسي وشغاّل في الرياضة كيف بتكون نهايته؟ عنا مثلاً الرجوب بيلعب بعدّاد عمرُه بس الشهادة لله ما حدا بيسترجي يحكي معه، حتى فخامته (وين ايّام الختيار لما كان يقول بالصوت العالي عالقدس رايحين...)! وحتى الشعب الي المفروض يطلع مسيرات ضد كلامه: انه حائط البراق مقدس لليهود وتحت السيادة اليهودية!! سلامته هالشعب قاعد وكاتم في قلبه وساكت! بس عالفيس غليان وحميان من تصريحاته العجيبة وابداعاته خاصة عالقنوات الاسرائيلية (الفيس ذكرنا بأفلامه القديمة ومنها شورط وفنيلا وكاب والي قال فيه إنه: لاعبة فلسطينية بشورط احسن من ملثمي الانتفاضة!) دخيل البطن الي حملك! وهاي مش أول الخبايص، وأجا يكحّلها عماها ونفى الي قاله.. معقول نسي! (إما السياسي أهبل أو كزااب بس برضو مش عينك عينك)، وطبعاً هون مش حقول باقي المسؤولين احسن، اسمحولي اشهد مع العروس وجارتها وعشرة من حارتها وأقول أغلبهم: بقولوا شي وبيعملوا شي تاني، وبيكتبوا شي تالت والله يستر من الي جواتهم، ولما يحكوا شي صح، بتكون جمعة مشمشية ورح تخلص وما تنعاد!!!!
المسؤول عنا هو الجاني ع حالُه، أو بصير وبيِتْصور في هالزمن الأهبل هاد (ودعوتي إنه هالمسؤول الي بِزَعبِر.. اشوف الزعبرة ع جلده!)... طيب وإذا دولة بتستنى كأس العالم شو رح تكون نهايتها؟ معقول تكون جنت على نفسها براقش؟ وكل الي صار إنه اللاعب الأمريكي "ترامب" جوز الست ميلانيا شاط جول في الخليج، وقلب قطر والمنطقة عشان قرشين حلوين (لا ارهاب ولا ما يحزنون.. العالم والحروب كلها لاحقة المصاري وبس)!
والي بتدعمهم قطر في فلسطين هم حماس وكم واحد من فتح (غريبة هالتوليفة!) وبما انه نحن العرب مش ناقصين تشتيت، فاسمحولي أولاً ادعي على إلي ما يتسمى صاحب الجول، وأقول بااااي لزلام قطر وين ما كانوا، ولزلام أي دولة فيها قواعد أمريكية، وأي دولة فيها نفط بتبيعه بالرخيص لأميركا وبيرجعلها مصنّع وأغلى بمليون مرة (يقطعُه الغباء)... وفوق كل هاد أمير قطر "البريء والغلبان" عامل عزيمة رمضانية لمشايخ منهم "القرضاوي" (في ناس لازم ينقِرضوا) وباس راسه كمان، مش غلط، بس هادا الزلمة تفكيره عَجَب، لهيك اسمحولي اسحّج شوي للهبّاش (شرٌّ لابد منه) الي وقّف للقرضاوي ومنها لما حرّم زيارة العرب والمسلمين للقدس والأقصى واعتبره تطبيع (لا يا عمي التطبيع الحقيقي هو انك تيجي ع عزيمة قطر الي شغّالة في المنطقة وفي بلدنا بالأزرق).
وبالآخر اعتبروا تسحيجي كمان جاي في جمعة مشمشية، واذا كان خطيئة انشاء الله ينمِسِح في هالشهر ... وما تنسوا المشمش ما بطوّل.. وشكلي رح اشوفكم في المشمش!!
بقلم/ بثينة حمدان
