والله يا ستي..

قلت ..

احكي مع روحك..

ما في حد ياستي ..

سامعنا في هالبلد..

القدس عم بتضيع..

والمسؤولين يا ستي..

اللي..

بيحكوا عن حالهم..

كبارية البلد..

بيلعبوا..

لعبة الغماية معنا..

بس مش متل الغماية ..

تبعت زمان واحنا صغار..

هالمرة بتفرق كثير..

احنا اللي منغمي..

عينينا ومنعد وبس..

وهمه يا ستي المتخبيين..

ومش عارفين نلاقي..

ابن حرام فيهم..

الله وكيلك يا ستي..

ما بكذب عليكي بحرف..

ونسيت احكيلك يا ستي..

انه الخان الاحمر..

اليهود بدهم يهدوا..

له يا ستي الله يسامحك..

مش عارفه الخان..

الخان يا ستي..

اللي مرة رحنا عليه واحنا صغار..

واشترينا خروف من هناك ..

عشان نذبحه ع العيد..

هيو عم بضيع هو كمان ..

مثل..

ما ضاعت دير ياسين..

وعكا وحيفا ويافا..

يعني باختصار يا ستي..

عم بضيع..

مثل ما ضاعت البلد كلها..

ولهلئيت يا ستي..

ما احنا عارفين..

وين اولاد هالحرام متخبيين..

قلت احكيلك..

عشان تساعدينا..

يمكن روحهم مرت من عندك..

ما همه الهم سنين مش مبينين..

وفقدنا الامل..

بس يا ستي..

بالله عليكي اذا شفتيهم..

امانة عليكي تمسكيهم..

عندك ما ترجعيهم ع هالبلد..

وبالبربيج..

يا ستي على مؤخراتهم اعطيهم..

يمكن تحمر من الخجل..

لانه وجوهم مكلحة..

مش قابلة تخجل..

بقلم/ حسن عجوة