•  نادية الشناوي

 امبارح بالليل ما اعرفت أنام فحاولت أستغل الهدوء وانه الكل نايم وقلت أعمل تمارين تأمُّل هاي تمارين بتساعد ع الاسترخاء بتصفّي الذّهن وبتريِّح نفسياً انا شخصيا بتجاوب معها المهم فتحت اليوتيوب ع مدرب تأمل عشان الاشي يكون تركيزه اكبر قعد يقول خلي لسانك بسقف حلقك غمض عيونك ارخي عضلات جسمك بالكامل حرر أفكارك وحاول تسترجع ذكرى سعيدة حصلت معك وارجع فكر فيها وعيشها مرة تانية بذهنك هلأ،
أنا طبعا اعملت كل شي حكاه خطوة بخطوة بس لما اجيت أسترجع ذكرى خلتني سعيدة مخي تكهرب اخده يمين آخده شمال إني ألاقي ذكرى حسستني بالسعادة أكمل فيها بس تمرين هالتأمل أبدا لا أنا ذكرى ولا باجي فتحت عيوني وسكرت التليفون وصفنت أنا شخص أبسط الأمور والمواقف بتخليني سعيدة بس هو بيحكي عن شي عميق شي كل ما أفكر فيه أبتسم وأكون سعيدة إنه جزء من ذاكرتي وأنا كل موقف حسسني بالسعادة كان مؤقت وتبعياته بعد هيك كانت سيئة فمش حابة حتى أتذكره لانه السوء فيه مهيمن ع نشوته.
حاولت أتذكر الوقت الي أنجبت فيه أطفالي لإنهم مصدر سعادة إلي بس لقيت إنه الظروف المـُحيطة فيا كانت أسوأ من إني أستمتع بحدث جميل متل هيك وأرجع أستحضره، وضلَّت الحلقة مفقودة حلقة السعادة مختفية تماماً، حاولت أتذكر أيام طفولتي بس الشي الي كان يفرحني وقتها صعب أقدر أحس بسعادته هلأ ولا حتى أيام دراستي ولمة صحباتي كلها كانت متع مؤقتة ، قطع يعرب حبل أفكاري ودخل الغرفة لقاني قاعدة وصافنة قلتله قبل ما يترجم حيرة ملامحه لكلام _ذكرني بشي سعيد حصلي فحياتي ممكن أسترجعه هلأ بذهني وأحس بحلاوته, صفن هو التاني وتمتم قلي متزكرة لما كنت انكد عليكي وأجبلك ورد طب متزكرة لما جبتلك الوجبة الي بتحبيها، هههههههه قلتله يعني أغمض عيوني وأتذكر هالشي العظيم وأعيشه مرة تانية وأحس بالنشوة والسعادة المُطلقة! حسيت بغصة كبيرة لإني فاهمة تماماً شو سبب إنه ما في ذكرى واحدة سعيدة ممكن استرجعها فحياتي والسبب إني كائن ما بيختار... كل شي مفروض عليه وما بعتقد في أمتع وأجمل من لحظة تختارها انت شخصياً باقتناع وتعيشها وتحبها وتشعر فيها بشكل كامل وتكون سيد نفسك وخياراتك فيها، كيف ممكن يكون في سعادة وجواتك شغف ما اقدرت تحقق منه شي!! وطريق حياة مُعيّن مش قادر تُسلكه وأفكار مش قادر تنفّذها ،طبيعي وسط هاد الكم من الأغلال والقيود إلي بتلغيك بشكل كُلي وبتفرض عليك حياة بتناسب إلي حواليك فقط ما هتقدر تعيش لحظ سعادة واحدة حقيقية ومُطلقة.

جميع المقالات تعبر عن وجهة نظر أصحابها وليس عن وجهة نظر وكالة قدس نت