طيب الريس مش مع الانتفاضة وعندو تعليمات وتنسيق أمني .. خلصنا
زعما الفصايل والقادة خايفين من الاغتيال وما بدهم يعملوا خطابات ولا مؤتمرات صحفية للانتفاضة وشد أزر الجماهير بعدين يتهموهم بالتحريض .. خلصنا
طيب مناضلين الكاس والانفاس من ايش خايفين ؟ ولا ندوة ولا مؤتمر ولا ورشة عمل عن الانتفاضة ليش ؟
ملايين الدولارات قحشتوها عالندوات والورشات والسفرات وخربتوا الشباب ورقصتوهم عالديمقراطية والشفافية وهرتوهم غديات وفنادق ونشرات زي ما بدهم الدونرز وكرهتوهم بمجتمعهم وحرضتوهم عالهجرة مش انتو اللي فتحتوا عقولهم عالحكم الرشيد والادارة الرشيدة ولوثتوا عقولهم ولساناتهم ولما إجى موعد التطبيق صاروا بتعليمكم ضد العنف والانتفاضة عنف ما بتركب مع اللي علمتوهم إياه
طيب تبعين حق الانسان والنسوان بيشتغلوا في الرصد والتوثيق وما عندهم توجه للعنف وأصلا كلهم عندهم برامج ضد العنف والانتفاضة شيء من العنف وسالكين مع ما يفيد عمل الدونرز وكلهم الله وكيلك سياسيين ولما بتيجي انتخابات وإلا وزارات بيلبسوا البدل والقربطات وبتقدموا صفوف المرشحين ويصبحوا زي ما بيقولوا عن حالهم هما المؤهلين والفهمانين
طيب مراكز التنمويات شو دخلهم في السياسة والحكم الرشيد قبل الانتفاضة كل يوم ورشة عمل فلسطين إلى أين؟ وحماس إلى أين ؟ وعباس إلى أين ؟ ولما إجت الانتفاضة ولا حدا منهم عمل ندوة أو ورشة تحت عنوان الانتفاضة إلى أين ؟
طيب مراكز الاغاثات شو كان دخلهم في السياسة قبل الانتفاضة والسياسة مش الاغاثات هي لتجميل الوجه القبيح للحروب والمجرمين وإلا مش فاهمين وبتشتغلوا زي ما بدو الدونر ؟ علشان شعبنا يبوس راس اللي قتله وتذلوا الناس لاستلام المساعدات وتصوروهم وانتو معلقين يافطة اليو إس إيد والشيخ ظراط والأمير خراط طيب كنتو بتعملوا ندوات عن السياسة قبل الانتفاضة ليش شو كان دخل الاغاثة في السياسة وشغالين على ودنه الصحة خربانة والتعليم خربان والزراعة خربانة ونازلين في الحكومات طس هنا وهناك قصدي بغزة ورام الله وطلعتوهم أولاد كلب وانتو حبايب المواطن اللي بتساعدوه منيح وين الندوات والشغلانات الألبندا ؟ عملتوا ندوة وإلا ورشة عمل عن الانتفاضة بالتأكيد لا
وتبعين الصحة للجميع وبياخدوا حق الدوا من المواطن وهو جاي تبرعات طبعا هدول تبعين الانسانية والدوا والبامبرز والويل تشير وفرشات الهوا وعكاكيز الجرحى والمصابين ما حدا سامع صوتهم بيحضروا لهبشات أكبر وبيجمعوا المشاريع بدهم الحرب والانتفاضة توسع عندهم أزمة رواتب وهادول حرام ما كانوا بيعملوا ورشات عن السياسة وعناوين المصيبة إلى أين قبل الانتفاضة بس كلهم مرشحين للتشريعي وقادة سياسيين بس ما عملوا ولا ورشة عمل ولا ندوة عن الانتفاضة اللي مطلوب يعملوها في هذا الوقت مش هما قادة للمستقبل عاملين حالهم
والأدهى وأمر تبعين مراكز الابحاث هادول اللي داخلين عالصنت اللي اسمهم في بلاد الناس سوبر إليت واكسبرت ومحللين هادول اللي بيوجهوا الرأي العام قال كيف صاروا خبراء مش عارف كل واحد بيفتح مؤسسة وبيقول انو خبير وبيبدا يجيب مشاريع قال يا سيدي الدونرز بدهم ايانا نفهم أكثر علشان مصلحتنا لإنو شعبنا مش فاهم كيف يواجه الصراع طبعا كل فهلوي منهم في بلدنا لاقيها فرصة ومصدر دخل للمدرا وفصايلهم ومن نجاحهم الفاقع تاركين المهجر وجايين هنا واهبش يا هباش باسم الشعب والقضية قال ايش بيفكروا هدول الجماعة تبعين الأبحاث عن شعبنا مسقفين ومتخصصين بدهم يورونا الطريق واطبع أوراق وكتب ونشرات وموضة خبراء تقدير موقف قال وكأنوا شعبنا مش فاهم والجماعة بيقدرولنا الموقف واصرف يا صراف وزور يا مزوراتي وينكم بطلتوا تعملوا ندوات وورشات من يوم الانتفاضة ليش؟
حتى شبكة العنكبوت الوطنية بطلوا يشتغلوا سياسة من يوم بدت الانتفاضة ولا عندهم خبر ممكن مخهم سكر في نقص في الكاس والأنفاس بسبب المعبر
عارفين كل مناضلين الكاس والانفاس ليش ساكتين لإنو الدونرز موقفهم ضد الانتفاضة وهما تبع الدونرز وأي ندوة أو ورشة عمل عن الانتفاضة تعتبر تحريض وممكن يفلسوا ويمنعوا من السفر وفلسطين عند هدول المناضلين هي راتب وهبشة وسفرة وسكرة .. والله انكشفتوا للناس يا مناضلين الكاس والانفاس والفاس وقعت في الراس ولا ندوة عن الانتفاضة الله وأكبر واسم الله عليكوا
محدش يقول عملت بيان ولا عملت وقفة، الانتفاضة ورشة عمل متواصلة من يوم ما بدت لحد ما تنتصر يا شعبنا .. أليس كذلك ؟ والكلام لهنا ولهناك برام الله.
بقلم/ د. طلال الشريف
